رئیس جمهور افغانستان راهی تاجیکستان می شود

اشرف غنی رییس جمهور افغانستان برای انجام یک سفر کاری ماه ثور به دوشنبه پایتخت تاجیکستان سفر می‌کند.این اولین سفر رییس جمهور افغانستان به تاجیکستان پس از انتخاب وی به عنوان رئیس جمهور این کشور است.

بنا به اطلاع دفتر مطبوعاتی ریاست جمهوری تاجیکستان، سفر رئیس جمهور افغانستان به تاجیکستان در چارچوب مشارکت این کشور در آغاز اجرای پروژه کاسا- 1000 که قرار است در تاریخ 12 می (23 ثور) سال جاری برگزار شود، صورت خواهد گرفت.

علاوه بر رییس جمهور افغانستان در این مراسم «آلماس بیک آتامبایف» رئیس جمهور قرقیزستان و «نواز شریف» نخست وزیر پاکستان به تاجیکستان سفر و در مراسم افتتاح این پروژه شرکت خواهند کرد.

پروژه کاسا - 1000 از ظرفیت انتقال سالانه 1300 مگاوات برق از تاجیکستان و قرقیزستان به افغانستان و پاکستان برخوردار است.

قرار است در مرحله اول خط انتقال نیروی برق 500 کیلوواتی از منطقه «دوتکه» قرقیزستان تا «خجند» تاجیکستان که سیستم انرژی این 2 کشور را با هم متصل می‌کند، ساخته شود و سپس خط انتقال برق از تاجیکستان به کابل در افغانستان و از این کشور به «پیشاور» پاکستان ایجاد شود.